Du host ma gsogt, daß du fia imma bei mia bleibm wühst,
I Trottl hob da des nu glaubt.
Jetzt sogst auf amoi, daß’d vo mia goa nix mea hean wühst,
Wei unsre Liebe sei vastaubt.
Du sogst ma, daß i di a nimma mea so gean hob,
Wia’s amoi woa, so wiads nie me.
Owa i waß genau, daß du an aundan Freind host,
Drum red ned goa su bled dahea.

Kumm owa jo ned krochn
Noch a poa Wochn
Und sog, es duad da laad.
Dei foisches Rean
Wia i ned hean,
De Schmäh, de wean scho faad.

Du host ma amoi gsogt, daß i an geiln Oasch hob,
De scheenstn Haxn vo da Wöhd.
Owa dei neicha Oascha, dea hod a großes Auto,
Waun eam a sunst so maunches föhd.
Du wiafst ma plötzlich vua, daß i a oida Bsuff bin,
Und deswegn rennst ma jetzt davo?
Owa i waß: des is jo ollas nua a Ausred,
Wei gsoffn hob i oiwei scho.

Jetzt sitz i wieda oft bis Mittanocht im Wiatshaus,
Und kane drängt mi: Damma zoin!
Daham leg i mi daun benebit in de Hapfm,
Da Teifi soi de Weiba hoin!