Tausnd Joa waun i wuat,
Daun miassad i nu,
(Nota bene: Wauns des Bensionsoita
Weida eahöhn)
Nu, sogn mar amoi anaviazgtausndviehundadmoi
Noch Absdoaf aum Baunhof foan
Und anaviazgtausndviehundadmoi
Wieda zruck.
So schee Absdoaf is:
I waaß ned, ob mi des gfreirad!

Tausnd Joa waun i wuat:
I kunnt Gsichta schneidn,
Gschichtl druckn
Und bleed redn…
Tausnd Joa, sog i, waun i oiso wuat
(Nota bene: Und da Weissnsteina aah!):
I glaub need, daß ea üba mi wos schreibad!

Tausnd Joa waun i wuat …
Tausnd Joa waun i wuat …
I waas ned; i glaub,
Des dad ma ned guad.
Olladings: waun i noch tausnd Joa
– Gaunz ogsegn von a poa graue Hoa –
A nu so guad ausschaun mecht
Wia Absdoaf: nau, daun war’s ma recht!

grammiknedln, sauagraud,
schinknfleckal, gratiniad,
eapfigulasch mid an brod,
zölasupm, guad passiad.
knofieapfin, rahmsuppm,
eianockal und schbinod,
wuaschdgrapfal, gmischt mid an kaas,
kaasschbadsln mid graudsalod.
ravioli, paradeissoß,
eapfischöwal mid vü schbeeg,
söchrippal mid knofibrod:
do reißts da de wadln weg!

waasd eh nu, wias gschtaubt hod in unsara gossn,
und olle fassadn voi bledschn und fleeg?
wia olle boa wochn dea schtingade draktoa
in unsare senkgruama gschtiald hod noch dreeg?

waasd eh nu? de grindign, hözanen bangaln
beim Kleedoafa-wiatn, de woan nu a freid.
waunsd do drauf an schaas lossn hosd: DEES hod gschewad –
need wia bei de boistadn sidsbangaln heid.

„fargies ned den fuatschried! wos miar ois jedsd haum:
ochzg feanseebrogramme!“ – so redn de leid.
i bin hoid vo gesdan und scheiß auf’d brogramme,
wäu a gschissanes händi hod NEED dauand gleit!